عمرو زين العابدين
كلنا حنبقى نجوم بس الصبر ياجماعة !!!
دائماً ما اُفضل بدأ مواضيعي بتعاريف في اللغة والاصطلاح والعامية لكلمة الموضوع المفتاحية لاثراء النص ومعرفة الخيط التي تنسدل منه بقية المعاني ومنو ممكن نصل للراي والنقاش .
فالنجومية في اللغة هي مصدر صناعي من نُجوم ، اي كون الشخص لامعاً وصاحب بريق ، وهي حالة اعتراف فرد او جماعة بالهاله والبريق حول الشخص نتيجة الاهتمام من وسائل الاعلام والناس والنقطة دي تحديداً هي مدخلنا لموضوع اليوم .
النجم او المشهور او celebrity حديثاً هو نتاج وابن شرعي للبيئة والمناخ يختلف باختلاف المناخ العام ويتجدد مع الذوق العام .
كلنا عارفين انو دور الاعلام هو دور كبير في تكوين الراي العام ودور نقدي تفاعلي لحظي مع المجتمع بالاضافة الي الدور الحديث الترفيهي في عكس الواقع بالمسلسلات والافلام والاخبار وبرامج التوك شو ومباريات الكورة وكل اهتمامات المجتمع ولاحقاً السوشيال ميديا.
فنسبة لدور الاعلام في عكس الواقع دائماً تجد اصحاب الدور الاعلامي والمندرجين تحته هم متصدري مشهد الشهرة والنجوميه .
دائما ماكان دور الاعلام هو دور محوري في صناعة النجوم بالاضافة الي الدور التجاري واذا عكسنا مقالنا علي المشهد السوداني ، فالمشاهير في السودان هم نجوم الكورة والفن والاعلام والسياسيين ومن ثم ياتي بعدهم البقية ولاحقاً اصحاب التريندات المؤقته .
تجد الجميع يتبادل اللوم عند فشل النجم المصنوع
القنوات الإعلامية تضع اللوم على الجمهور وتقول «الجمهور عاوز كده» وهي محقة والجمهور برمي اللوم علي الاعلام وبقول “لاتصنعوا من الحمقي مشاهير ” المهم بنصل نقطة وبننسي كيف تم صناعة النجم ده .
وهي في الحقيقة صناعة متبادله تمت بين النجم نفسه والاعلام والجمهور ، بمعني اخر المحتوي ومدي ملائمته للفتره دي ومدي تقبل الناس ليه الفتره دي .
عشان كده غالباً ماتتم صناعة نجم او تريند في فتره ما نسبه للضائقة المعيشيه خلال فتره معينه ، هو بكون سبب انو يضحك الناس اليومين دي والناس زهجانة فبتم الDeal ، فالاعلام ببدا يتداولوا نسبه لقبول الناس ، الناس بتنسي بعد ماينتهي اليومين ، ببدوا ينتقدوا انوا اشتهر ، بعدها بتبدا دوامة اللوم المعروفه ويبدا النجم او التريند يترنح بين الاعلام والجمهور لحدي مايختفي .
السوشيال ميديا صنعت نجوم مختلفين خالص عن صناعه الاعلام ، منهم من نجح نجاح كبير نسبه لانو عندو جديد يقدموا ، وبعضهم رقد سلطة بعد الشهره لانو محتواه محتوي لحظي .
وفي ناس بعيداً عن كل ماذكر سابقاً ، هم تريند لحظي حتي مابكمل يومين ، بعدهم محبين للشهرة ومستعدين يقدموا الغالي والنفيس من اجلها ، وبعضهم بكون رقص والفيديو بقي viral وحتي هو اتفاجي من حجم المشاهدات .
ورسالتي لمحبي الشهرة بغض النظر عن المحتوي ، اصبروا ياجماعة زمنكم جاي بس خليكم جاهزين ورتبوا حاجة حتي لو هي مامهمه الفترة دي ، وخليكم متابعين لتطور الاحداث عشان الفرصة بتجي للجاهز ، اقروا المشهد وجهزوا تريند للمشهد الجاي وعايز اقول ليكم انو كلنا حنبقي نجوم بس الصبر .
لو مامصدقين شوفوا انو اغلب طبقات المجتمع كانت تريندات قبلي ظهور السوشيال ميديا وده ترتيبهم :-
١- قبلي الاستقلال 1956 كانت النجوميه #للاثرياء والطبقة المخمليه والعوائل الكبيرة والباشوات .
٢- بعد الاستقلال- النجم كان هو #النفوذ – اذا كان ظابط او موظف كبير في الدوله او سياسي وفي مثل مصري شهير وقتها كان “الكرنيه غلب الجنيه ”
٣- جاء وقت من الاوقات كانو نجوم المجتمع هم قراء القران #وائمة_المساجد “شيخ الزين وشيخ نورين ” واريتو كل الاوقات الوقت ده ”
٤- وبعدها الطرق الصوفيه اصبحوا نجوم المجتمع وقادته .
٥- وبعدها انتقلت النجومية #للشعراء والفنانيين الكانوا بدعوا للنضال في فتره المقاومة السريه للانقاذ ” محجوب شريف ، القدال ، فرقة عقد الجلاد وغيرهم)
٦- ثم في بداية التسعينات كانت النجوميه #للمزارعين ووقتها واشتهرت جملة ” سلة غذاء العالم ” واتجه اغلب الراسماليين للزراعة وقتها .
٧- ثم من (2006-2010) انتقلت النجوميه #لاعبي_الكورة في فترة ازدهار الهلال والمريخ ومستمرة لكن علي مضض كانوا نجوم السودان هم هيثم والعجب .
٨- ووقت ما كانوا النجمات هم #مذيعات_النيل_الازرق بس واي زول تاني كلبه ميته .
٨-ثم #الفنانيين وبرضو مستمرة لكن بنظام الصرفه
كل سنه علي واحد ، واغاني واغاني هو السبب المباشر في شهرتهم .
٩-الي ان جاءت في الالفيات الحديثة كان النجم – #عمر_البشير والكيزان ومن تبعهم ببهتان الي يوم الاثنين .
بعداك ظهرت موضه الدهب في الاقاليم وانتقلت النجوميه #للدهابه وبقوا هم الراسماليين في السودان واصحاب النفوذ وبغنوا ليهم وبنقطوا في الحفلات كمان .
١٠-ثم ايام الثورة كانت النجومية المطلقة ل ” #دسيس_مان والاء صلاح وياخوانا الشاي ” واي زول حافظ قصيدة او حافظ كلمتين ثوريات …
واتقاسم معاهم النجوميه لجان المقاومه في الفترة ديك .
١١- وبعد الثورة كانت النجوميه للمعارضه واحزاب الفكة والسياسيين والتوم هجو ومني وباقي الشلة .
١٢- خلال فترة الثورة كانت النجومية ملك #للناشطين واللايفات “ناس ذو النون”
١٣- وفي الكورونا كانت النجومية المطلقة ل #للدكاترة ” والمتطوعيين وتطبيق بنكك .
١٤- من (2019) انتقلت النجومية كامله لاولاد الحلة #ولجان_المقاومة واللساتك .
١٥- ياخ اذا كان جاء وقت كانت النجوميه المطلقه كلها #للتوم_هجو و #اردول ماتجيك انت !!!
١٦- خلال فتره الحرب الاولي كانت النجوميه للخالوا شغال في الجيش واي زول ممكن ينقل معلومه او ينزل بوست .
١٧- في الحرب انتقلت النجوميه للدعامه والجياشه وجماعة البراء ابن مالك والكيزان واي واحد لابس كاكي.
٨٦-وحالياً النجومية المطلقة #للكيزان ، وفي السوشيال ميديا لل #التيك_توك .
فاصبروا ياخوانا ،، دوركم بجي والله بجي …
كلنا حنبقي نجوم بس نلوك الصبر …
